Kailan pinakamagandang bumisita sa Spain?

Ang unang buwan ng taon ay isang tahimik na buwan sa Spain, kaya tamang-tama para sa mga hindi gusto ang dagsa ng maraming tao at okay lang sa mas malamig na panahon. Maaaring umakyat ang mga temperatura nang hanggang 16°C sa pinakamaiinit na katimugang rehiyon, at bumaba ng below zero sa mga lugar na may mataas na altitude tulad ng Pyrenees at ang Sierra Nevada. Gayunpaman, ang nasabing maginaw na panahon ay nagdadala ng maraming snow sa mga kabundukang ito, kung saan pagsapit ng Enero ay nasa kasagsagan ng operasyon ang mga ski resort. Kaya maliban kung papunta ka sa The Canaries, siguradong kakailanganin mo ang iyong pinakamainit na winter coat.

Mayroon ding kaunting festive event na nangyayari sa Enero, kabilang ang Reyes Magos (Pista ng Tatlong Hari) sa Enero 6 – ang bersyon ng Spain ng Araw ng Kapaskuhan. Sa gabi bago nito, libu-libong tao ang pumaparada sa mga kalye sakay ng malalaking float na may tema ng nativity, na ginagabayan ng tatlong hari (kadalasang tatlong masuwerteng miyembro ng lokal na konseho) na pinangungunahan ang isang pambihirang pagpapaagaw ng candy. Napakagandang panahon din ang Enero para samantalahin ang mga murang flight at malalaking bawas-presyo sa mga sale pagkatapos ng Kapaskuhan, na kilala rito bilang “las rebajas.”

Bagama’t kadalasang pinakamalamig na buwan ng taon sa Spain, ang Pebrero ay hindi kapos sa mga dahilan para bumisita – lalo na kung palapunta ka sa mga festival. Sa lungsod ng Cádiz sa Andalucia, ang napakasayang “Carnaval” ay may kaakibat na dalawang linggo ng mga prusisyon ng magarbong kasuotan, na umaakit ng libu-libong tao mula sa iba’t ibang panig ng bansa. Ang tanging party na may mas mataas na bilang ng tao ay ang Las Palmas de Gran Canaria carnival – na idinaraos sa Las Palmas na may iba-ibang kulay bahagharing theme bawat taon.

Gayunpaman, hindi lang ito puro maiingay at makukulay na fiesta. Pinagdarausan ang Madrid ng isa sa pinakamalalaking pagdiriwang ng kontemporaryong sining sa Europa, ang Feria Internacional de Arte Contemporáneo, habang sa kanlurang rehiyon ng Extremadura, nagtitipon ang mga birdwatcher para ipagdiwang ang pagdating ng iba’t ibang species sa Monfragüe National Park. Mayroon ding medieval-themed festival sa bayan ng Teruel, Aragon na nasa mataas na altitude – ngunit magsuot ng mainit na damit kung pupunta ka, dahil ang mga temperatura dito ay maaaring bumagsak nang mas mababa kaysa sa kahit saang dako sa Spain sa maginaw na bahaging ito ng taon.

Sa pagdating ng spring, nagsisimulang uminit ang mga bagay-bagay sa bawat araw na dumaraan hanggang biglang parang hindi na masyadong malayo ang summer. Sa gitna at timog ng Spain, malamang na magawa mong mag-suot lang ng t-shirt sa hapon, basta walang hangin o mga ulap. Ngunit gugustuhin mo itong itago sa loob ng iyong sweater kung bibisita ka sa kahit saan sa hilaga ng Madrid – at maaaring maging malakas at pabigla-bigla ang buhos ng ulan sa buong Spain, kaya siguraduhing magdala ng kapote.

Sa Marso rin nagaganap ang dalawa sa pinakakilalang cultural event ng Spain. Sa Andalucia, kasalukuyan nang nangyayari ang Festival de Jerez sa Jerez, na ipinapakita ang mga pinaka-talented na flamenco performer ng bansa sa lugar na pinagmulan at sentro ng pinakasikat na musical genre ng Spain. Ngunit ang pangunahing event ay paniguradong ang Las Fallas ng Valencia – isang kamangha-manghang festival ng walang humpay na inuman at sayawan, mga napakapambihira (at napakaingay) na firework display, live music, at satirical humor. Nagtatapos ang lahat ng ito sa isang pangmasang ritwal ng pagsusunog ng mga higanteng papier-mache effigy (na lokal na kilala bilang “ninots”) sa mga kalye – isang palabas na hindi mo gugustuhing mapalampas.

Sa Abril, nasa kasagsagan na ang spring – at sa ilang partikular na baybayin, maaari kang mag-sunbathing nang ilang oras sa beach. Habang nasa kasagsagan ng pamumukadkad ang mga ligaw na bulaklak, napakagandang panahon din ito ng taon para sa paglilibot sa mga park at mas rural na lugar tulad ng Valle del Jerte sa hilagang Extremadura. Ngunit mag-ingat dahil maaaring bumuhos ang ulan anumang sandali, kaya tiyak na kapaki-pakinabang na magdala ng kapote.

Maraming tao ang pumupunta sa labas para panoorin ang mga parada ng kandila sa Semana Santa na nagaganap sa mga lungsod sa buong Andalucia at Castille-Leon. Suot-suot ang mga hooded robe na may iba’t ibang kulay, ang mga “kapatiran” na nangunguna sa mga parada ay nagbubuhat ng tig-dalawang karosa ng santo mula sa kanilang simbahan papunta sa katedral ng lungsod at pabalik muli. Sa huling yugto ng buwan, makikita ang locals sa Feria de Abril ng Seville na nagsusuot ng kanilang pinakamagagandang flamenco dress, sumasakay sa kabayo, at sumasayaw buong gabi. Sa ibang lugar, naaakit ang mga mahilig sa pagkain sa mga festival tulad ng Mercat de Ram sa bayan ng Vic sa Catalonia, at sa Feria del Queso (mas maraming keso kaysa sa nakita mo na rati) sa bayan ng Trujillo, Extremadura.

Isang napakagandang panahon para magpunta sa Spain, halos kahit nasaan ka. Iinit ang mga temperatura sa iba’t ibang panig ng gitna at katimugang rehiyon, habang ang napakaganda’t luntiang hilaga ay magiging mas mainit at nakahanda para sa mga outdoor activity tulad ng hiking at mountain biking. Nagsisimula sa French Pyrenees patungo sa kanlurang baybayin ng Spain, kilalang-kilala ang Camino de Santiago walking trail at nagiging matao ito sa Hunyo. Gayunpaman, maraming iba pang trail na nagsisimula sa iba-ibang bahagi sa palibot ng Spain, na dinadala ang mga naglalakad sa iba’t ibang nakamamanghang landscape na nasa kanilang daan patungo sa finish line sa Santiago de Compostela.

Napakagandang panahon din ang Hunyo para bisitahin ang Spain dahil sa lahat ng iba’t ibang festival na nangyayari. Nagaganap ang mga pagdiriwang ng Corpus Christi sa Toledo at maraming iba pang bayan, habang pinagdarausan ang Barcelona ng dalawa sa pinakamalalaking rock, pop, at dance music festival ng taon sa pamamagitan ng Sonar at Primavera Sound. Nangyayari ang lahat ng ito bago ang isang nakamamanghang finale sa Hunyo 23, ang Noche de San Juan, kung kailan pinapailawan ng mga beach bonfire at kamangha-manghang firework display ang mga bayan sa baybaying-dagat sa buong Spain.

Hindi maipagkakaila na ang Hulyo ay ang pinakaabalang buwan para sa karamihan ng mga destinasyon sa Spain, kung saan may mga positibo at negatibo, depende kung paano mo ito titingnan. Halimbawa, kapag lalabas sa gabi, magkakaroon ka ng maraming mapagpipiliang mga buhay na buhay na bar at restaurant. Ngunit baka mahirapan kang makahanap ng tunay na Spanish atmosphere sa mga mas tourist-friendly na resort ng Costa del Sol o Costa Blanca.

Tulad ng inaasahan, napakatindi ng init pagsapit ng Hulyo – kaya kakailanganin mong magdala ng maraming sunblock. Maaaring madaling makalimutan ang tindi ng init kapag ini-enjoy ang iyong sarili sa mga festival tulad ng Festival Internacional de Benicàssim, malapit sa Valencia, o ang Festival de la Guitarra de Córdoba – ang pagdiriwang ng musika ng gitara, mula flamenco hanggang rock, blues, at marami pang iba. At, hindi lang ‘yan. Nagaganap nang higit sa isang linggo ang sikat sa buong mundo na San Fermín (pagtakbo ng mga toro) ng Pamplona, habang ipinagdiriwang nang nakamamangha ang Día de Santiago (Feast of St. James) sa Santiago de Compostela sa Hulyo 25.

Sa Agosto, punung-puno ang mga beach resort ng Spain ng parehong dami ng turista at mga tagaroon – na determinado lahat na takasan ang nakakapasong init (kadalasang higit sa 35°C) ng mga inland na lungsod tulad ng Seville, Córdoba, at Madrid. Maging ang mga baybaying destinasyon tulad ng Barcelona, Málaga, at Valencia ay maaaring maging masyadong maalinsangan para i-enjoy, kaya naman marami ang kumukuha sa pagkakataong libutin ang mas malalamig na hilagang-kanlurang Atlantic coast ng Spain. Dito, ang mga temperatura ay naglalaro mula sa mababang twenties papunta sa mababang thirties, at binabawasan ng simoy ng dagat ang init sa mga sobrang init na araw.

At kung hindi masyadong nakakatukso sa ‘yo ang mas malamig na panahon, baka maakit ka sa mga pagkain. Kilala ang rehiyon ng Galicia sa seafood nito, lalo na sa octopus, na itinatampok nang madalas sa anumang tapas menu at mayroon pa ngang sarili nitong nakalaang festival, ang Festa do Pulpo – na idinaraos sa pangalawang Linggo ng Agosto sa maliit ng bayan ng Carballiño. Pababa ng daan sa Cambados, ipinagdiriwang ng limang araw na Festa do Albariño ang paboritong fruity white wine ng Galicia, samantalang nagaganap ang Fiesta de la Sidra Natural sa karatig at mahilig sa cider na rehiyon ng Asturias sa ika-apat na linggo ng buwan.

Bukod sa mga sinabi, maaari mong piliing magpalamig sa ibang paraan sa pamamagitan ng pagsali sa kakatwang batuhan ng kamatis sa La Tomatina, na idinaraos tuwing Agosto sa bayan ng Buñol sa Valencia.

Nagdadala ang Setyembre ng nakalulugod na pahinga mula sa mga napakainit na temperatura ng tag-araw, ibig sabihin, hindi na masyadong mahirap labanan ang init sa mga lugar tulad ng Madrid at Seville. Ang pinakamalalamig na araw sa mga hilagang rehiyon ay may posibilidad na maglaro sa 17°C, samantalang ang pinakamaiinit na araw sa kahabaan ng timog baybayin ay maaari pa ring umabot nang lampas sa 30°C – kaya ang sunblock ay isa pa ring mahalagang item na dapat mong dalhin.

Ang panahon ng transisyong ito ay napakagandang oras para maglibot sa halos kahit saan sa Spain, at marami ring festival na nangyayari. Isang hindi dapat palampasin ay ang Fiesta de San Mateo, na idinaraos sa rehiyong gumagawa ng wine, ang La Rioja, sa ikatlong linggo ng Setyembre bilang paggalang sa anihan ng ubas. Ang kabisera ng rehiyon, ang Logroño, ay puno ng mga pagdiriwang – kabilang ang pagkakataong pisain ang mga ubas gamit ang iyong paa – at (siyempre) maraming world-class wine. Kasama sa iba pang event na maaaring tumukso sa iyo ang film festival ng San Sebastián na dalawang linggo tumatagal, ang napakasayang Festes de la Mercè ng Barcelona, at ang Bienal de Flamenco – ang pinakaprestihiyoso sa mga flamenco festival na salitang idinaraos sa Seville at Málaga.

Bagama’t parang sariwa pa rin ang mga alaala ng spring, hindi magtatagal bago magsimulang kumagat ang ginaw ng winter sa panahon ng Oktubre. Napakarami ng mga sign, mula sa makakapal na coat at mahahabang leather boots hanggang sa mga madilaw-dilaw na dahon na binabalot ang mga plaza ng lungsod. Sa pagtatapos ng buwan, ang mga temperatura ay may average na naglalaro sa mid-tens sa malaking bahagi ng Spain, bagama’t baka maaari kang magsingit ng late na bakasyon sa beach sa Mallorca o isa sa iba pang Balearic Islands, kung saan ang mga bagay-bagay ay mas mainit nang humigit-kumulang sampung degrees.

Gayunpaman, ang pinakamagandang paraan para maranasan ang autumn sa Spain ay tanggapin ang mga nagbabagong temperatura, iyon man ay sa pamamasyal sa napakagandang countryside ng Andalucia o pag-surf sa naglalakihang alon sa Atlantic coast (kung saan kailangan mong magdala ng wetsuit). Para sa mga lugar na hindi masyadong pinupuntahan ng mga tao, maaari kang magtungo sa masiglang Irati Forest ng Navarre sa hilagang-silangang border sa bandang France, o ituloy lang ang party sa Fiestas del Pilar ng Zaragoza. Nagaganap din ang National Day ng Spain sa Oktubre 12, at ipinagdiriwang ito sa buong bansa.

Habang abot-tanaw na ang taglamig, malamig at presko ang mga temperatura sa buong Spain sa panahon ng Nobyembre – kaya tamang-tamang panahon ito na bumisita para sa mga gustong iwasan ang init. Lumilikha ang madidilim na kulay ng autumn at matitingkad na asul na kalangitan ng bagung-bagong natural na kapaligiran na masayang libutin, lalo na sa mga rural na lugar ng Andalucia. Gayunpaman, tandaan na ang mga lugar sa hilaga na may mataas na altitude ay magiging mas malamig at maaari pa ngang makakita ng pag-ulan ng snow tungo sa pagtatapos ng buwan.

Pagkatapos ng summer calendar na punung-puno ng mga festival at fiesta, karaniwang nagsisimulang manahimik ang mga bagay-bagay pagsapit ng Nobyembre. Sa kabila nito, ang unang araw ng buwan ay ang All Saints’ Day – isang pambansang holiday para sa paggunita sa mga yumao at pag-enjoy ng napapanahong pagkain. Makalipas ang ilang araw, ipinagdiriwang ng mahihilig sa sherry ang kanilang paboritong alak sa Jerez para sa International Sherry Week, habang ang mga tagaroon sa Potes – isang maliit na village malapit sa Santander – ay binibigyang-galang ang kanilang tradisyonal na inumin sa Festival de Orujo. Maaari ka ring dumalo sa mga international jazz festival sa Granada at Madrid, kung saan tumatagal nang buong buwan ang mga naka-schedule na event.

Ang magiginaw na temperatura ng Disyembre ay sinasalba ng iba’t ibang Christmas market sa maraming bahagi ng bansa, mula sa Bilbao at Barcelona hanggang sa Madrid at Seville. Makakahanap sa mga ito ng tradisyonal na crafts, mga nativity scene, at mga artisanal na produkto tulad ng turrón at manchego cheese. Ipinagdiriwang ang mismong Araw ng Kapaskuhan bilang isang pambansang holiday, bagama’t nakalaan ang mga pangunahing pagdiriwang para sa Enero. Ang Bisperas ng Bagong Taon ay isang mas malaking party, kung saan sinusubukan ng mga Spaniard na kumain ng 12 ubas (isa para sa bawat chime) kapag pumatak ang orasan sa hatinggabi.

Sa mga rehiyon, may mas kaunting event kaysa sa ibang buwan – ngunit ang mga nakamamanghang Pamaskong pailaw ng Málaga ay medyo naging attraction na, lalo na sa gabi na sinisindihan ang mga ito sa kahabaan ng Calle Larios. Sa hindi kalayuan, umaakit ang bayan ng Torrox ng libu-libo dahil sa taunang Migas Festival nito – isang pagdiriwang ng “migas,” ang pinakakaraniwang na dish ng rehiyon. At para sa mga mas gugustuhing magpalipas ng winter sa isang beach, hindi mo na kailangang mas lumayo pa kaysa sa subtropical na Canary Islands, kung saan kumportableng nananatili ang mga temperatura sa pagitan ng 17–23°C sa buong buwan.